សួស្តីលោក លោកស្រី ដែលជាអ្នកអាណាព្យាបាល អតិថិជន និងប្អូនៗសិស្សានុសិស្សអស់គ្នា!

សាលារៀន អន្តរទ្វីប អាមេរិកាំង សាខាផ្សារថ្មី  សូមស្វាគមន៍អ្នកទាំងអស់គ្នាដែលបានចូលមក កាន់គេហទំព័រ របស់យើងខ្ញុំ។ យើងខ្ញុំពិតជាមានកិត្តិយសណាស់ដែលបានបង្ហាញជូនអស់លោក លោកស្រី និងប្អូនៗទាំងអស់គ្នានូវអ្វីដែលយើងបានធ្វើ កំពុងធ្វើ និងអ្វីដែលជាទិសដៅរបស់យើង ក្នុងនាមជា ថ្នាលបណ្តុះបណ្តាលធនធានមនុស្សមួយប្រកបដោយគុណភាព និងជាទីទុកចិត្តរបស់ អ្នកអាណាព្យាបាល និងប្អូនៗសិស្សានុសិស្សទាំងអស់ដែលកំពុងមានវត្តមាននៅក្នុងគ្រឹះស្ថាន របស់យើងខ្ញុំ។ នាងខ្ញុំតំណាងឱ្យលោកគ្រូ អ្នកគ្រូ និងបុគ្គលិកទាំងអស់ នៅក្នុងសាលារៀន អន្តរទ្វីប អាមេរិកាំង សាខាផ្សារថ្មី មានការតាំងចិត្ត និងជំនឿចិត្តយ៉ាងមុតមាំថាពួកយើងនឹងបណ្តុះបណ្តាល ប្អូនៗទាំងអស់ដែលកំពុងសិក្សានៅក្នុងគ្រឹះស្ថានរបស់យើងខ្ញុំឱ្យទៅទាំងព្រមជាមួយនឹងចំណេះដឹង ចំណេះធ្វើ សីលធម៌ល្អប្រពៃ និងចេះរស់នៅជាមួយគ្នា ដែលគេឱ្យឈ្មោះថា ចតុស្តម្ភនៃការអប់រំ ដោយស្របតាមចក្ខុវិស័យវិស័យរបស់សាលារៀន និងគោលនយោបាយអប់រំរបស់ ក្រសួងអប់រំ យុវជន និងកីឡា ក្នុងយុគសម័យឌីជីថល។ សិស្សានុសិស្សដែលសិក្សានៅសាលារៀន អន្តរទ្វីប អាមេរិកាំង នឹងក្លាយទៅជាធនធានមនុស្ស ដ៏សំខាន់នៅពេលអនាគត ជាសរសេរស្តម្ភ ដ៏រឹងមាំសម្រាប់ប្រទេសជាតិ។ ជាការពិតណាស់ ការតាំងចិត្ត និងមានជំនឿចិត្តខាងលើនេះ ពិតជាមិនអាចខ្វះបានពីសំណាក់អស់លោក លោកស្រី ដែលជាអ្នកអាណាព្យាបាល សិស្សានុសិស្ស មហាជន រដ្ឋាភិបាល និងអ្នកពាក់ព័ន្ធផ្សេងទៀតដែលជាកត្តាលិករ និងជាដៃគូរដ៏មានសារៈសំខាន់ក្នុងការជួយជ្រោមជ្រែងអ្នកជំនាន់ក្រោយរបស់យើង ឱ្យក្លាយទៅជា គ្រាប់ពេជ្រសម្រាប់គ្រួសារ និងសង្គមជាតិ។

          ជាចុងក្រោយនាងខ្ញុំពិតជាមានសេចក្តីសោមនស្ស អំណរអរគុណដល់លោក លោកស្រីជា មាតាបិតា និងអ្នកអាណាព្យាបាលសិស្ស ដែលតែងតែផ្តល់ទំនុកចិត្តដល់សាលារៀន អន្តរទ្វីប អាមេរិកាំង ក៏ដូចជាក្រុមហ៊ុន MJQE។ សូមគោរពជូនពរលោក លោកស្រីជាមាតាបិតា និងអ្នក អាណាព្យាបាល ព្រមទាំងប្អូនៗសិស្សានុសិស្សទាំងអស់មានសុខភាពល្អ សុភមង្គលក្នុង ក្រុមគ្រួសារ និងជោគជ័យគ្រប់ភារកិច្ច។

        រីករាយស្វាគមន៍ជាមួយការចូលមកកាន់ សាលារៀន អន្តរទ្វីប អាមេរិកាំង សាខាផ្សារថ្មី !

       នាងខ្ញុំ​ពិតជា​មាន​សេចក្តី​សោមនស្ស​រីករាយ​យ៉ាង​ខ្លាំង​សម្រាប់​ការចូលរួម​គាំទ្រ​ សហការ​ពីសំណាក់​លោក​ លោកស្រី​ដែល​ជា​មាតា​បិតា​ ឬអ្នកអាណាព្យាបាល​ដែល​តែងតែ​ពេញចិត្ត​ ហើយ​ជឿជាក់​លើ​​​   សេវាកម្ម​ គុណភាព​ និង​វិន័យ​របស់​សាលារៀន​យើង​កន្លងមក​រហូតដល់​បច្ចុប្បន្ន​។ ទន្ទឹម​នឹង​ការ​ជឿជាក់​របស់​លោកអ្នក​ ក្រុមការងារ​យើង​ក៏​រឹតតែ​មាន​កម្លាំងចិត្ត​បន្ត​ព្យាយាម​ និង​អភិវឌ្ឍ​ លើ​គ្រប់​ផ្នែក​នៃ​សាលារៀន​។ AIS​ ត្រូវ​បាន​ទទួលស្គាល់​ដោយ​ក្រសួង​អប់រំ​ យុវជន​ និងកីឡា​ ព្រម​ជាមួយ​កម្មវិធី​សិក្សា​ស្របតាម​ក្រសួង​ដាក់​ជូន​ផង​ដែរ​ ។ ក្រោម​ការ​ព្រួយបារម្ភ​ និង​ខ្វល់ខ្វាយ​ពី​លោក​ប្រធាន​គួច​ ម៉េ​ងលី​ សាលារៀន​យើង​បាន​បង្កើត​មជ្ឈមណ្ឌល​សុខភាព​ ម៉េ​ងលី​ ជេ​. គួច​​ សម្រាប់​ពិនិត្យ​ និង​ព្យាបាល​ជូន​ដល់​ប្អូន​ៗសិស្សានុសិស្ស​ និង​បុគ្គលិក​គ្រប់​ផ្នែក។

ជាទីបញ្ចប់​ នាងខ្ញុំសូម​ថ្លែងអំណរគុណ​ដល់​លោក​ លោកស្រី​ដែល​តែងតែ​ចូលរួម​ សហការ​គាំទ្រ​ និង  ​ផ្តល់​ទំនុកចិត្ត​មក​លើ​សាលារៀន​យើង​កន្លងមក​ ហើយក៏​សង្ឃឹម​ដែរ​ថា​លោកអ្នក​នៅតែ​បន្តសកម្មភាព​សហការ​នេះ​ជាបន្តបន្ទាប់​ទៀត​ ។

ការអប់រំល្អ ផ្តល់ភាពបវរដល់អនាគត!

ជា ហ៊ុយមាន ជាយុវតីម្នាក់រៀននៅសាលា AIS សាខាផ្សារថ្មី ថ្នាក់ទី១១ "ក" ឆ្នាំសិក្សា២០២០-២០២១។

សូមជម្រាបសួរដល់មាតាបិតា​ អាណាព្យាបាល និងសិស្សានុសិស្សទាំងអស់គ្នា! នាងខ្ញុំឈ្មោះ ជា ហ៊ុយ​មាន ជាសិស្សថ្នាក់ទី១១ក​ វេនរសៀល ឆ្នាំសិក្សា២០២០-២០២១នៃសាលារៀន អន្ដរទ្វីប អាមេរិកាំង សាខាផ្សារថ្មី និងជាប្រធានក្លឹបគុណភាព និងវិន័យនៃក្រុមប្រឹក្សាសិស្សប្រចាំសាខាផងដែរ។​

«ខ្ញុំមកសាលារៀនមិនមែនមករៀនតែមួយមុខទេ»។​ ជាការពិតណាស់ លោកគ្រូអ្នកគ្រូ​នៅសាលារៀនគ្រាន់តែជាអ្នកអុជប្រទីបបំភ្លឺផ្លូវយើងប៉ុណ្ណោះ ពោលគឺគាត់បង្រៀនជាមេរៀនទ្រឹស្ដីដល់សិស្សានុសិស្សទុកជាដើមទុនក្នុងខ្លួនដើម្បីយកទៅប្រើប្រាស់នាពេលអនាគត។​ អ្វីដែលសំខាន់គឺយើងចេះយកចំណេះវិជ្ជាទាំងនោះមកអនុវត្ត និងប្រើប្រាស់ក្នុងជីវិតរស់នៅប្រចាំថ្ងៃ​។ យើងអាចចាប់ផ្ដើមពីការចូលរួមធ្វើការងារសាលា ការងារស្ម័គ្រចិត្តផ្សេងៗក្នុងសង្គម។​ វាមិនត្រឹមតែអាចឱ្យយើងយកចំណេះវិជ្ជាដែលបានរៀនពីសាលាមកអនុវត្តប៉ុណ្ណោះទេ​ ថែមទាំងផ្ដល់នូវបទពិសោធន៍ថ្មីៗដែលអាចឱ្យយើងយកទៅអភិវឌ្ឍខ្លួនឈានទៅរកភាពរីកចម្រើនរុងរឿងទៀតផង។ ហេតុដូច្នេះហើយទើបសាលារៀន​  អន្ដរទ្វីប អាមេរិកាំង បានបង្កើតនូវក្រុមប្រឹក្សាសិស្ស (Student Council)​ ដែលជាកន្លែងល្អឥតខ្ចោះសម្រាប់បណ្ដុះគំនិតសិស្សានុសិស្សដូចដែលបានបរិយាយខាងលើ។​ ក្រុមប្រឹក្សាសិស្សបែងចែកជា៥ក្លឹបដូចជា​ ក្លឹបគុណភាព និងវិន័យ ក្លឹបអ្នករៀបចំផែនការ ក្លឹបអ្នកសារព័ត៌មាន ក្លឹបមិត្តជួយមិត្ត និងក្លឹបSTEAM ផ្ដល់ជាជម្រើសដល់សិស្សានុសិស្សក្នុងការជ្រើសរើសឱ្យសមស្របទៅតាមចំណង់ចិត្ត និងជំនាញរបស់ខ្លួន។

ក្រុមប្រឹក្សាសិស្សនេះប្រៀបបាននឹងសង្គមការងារមួយដែលអនុញ្ញាតឱ្យសិស្សានុសិស្សបញ្ចេញគំនិតស្នាដៃរបស់ខ្លួនទៅតាមផ្នែកនីមួយៗ ធ្វើការរួមគ្នាជាមួយសិស្សានុសិស្សដទៃមកពីគ្រប់សាខានៃសាលារៀន អន្ដរទ្វីប អាមេរិកាំង។ ក្នុងនាមជាសមាជិកម្នាក់ក្នុងក្រុមប្រឹក្សាសិស្ស ខ្ញុំអាចនិយាយបានថាវាពិតជាផ្ដល់អត្ថប្រយោជន៍គួរជាទីកត់សម្គាល់ដល់រូបខ្ញុំ តួយ៉ាងដូចជា ភាពជាអ្នកដឹកនាំ រាប់អានមិត្តភក្ដិថ្មីៗ ចេះធ្វើនូវការងារមួយចំនួនដែលខ្លួនមិនដែលធ្វើពីមុនមក យល់ដឹងកាន់តែច្បាស់ពីខ្លួនឯង និងសង្គម។

រីឯការសិក្សារបស់ខ្ញុំវិញ​ គឺតែងតែទទួលបានផលល្អប្រសើរ។ នេះក៏ព្រោះតែសាលារៀនមានគុណភាព វិន័យ និង មានបរិយាកាសគួរឱ្យចង់រៀន។ លោកគ្រូ អ្នកគ្រូយកចិត្តទុកដាក់បង្រៀន គួបផ្សំជាមួយនឹងការព្យាយាមរបស់ខ្ញុំ ផ្ទាល់។ តើធ្វើយ៉ាងណាទើបទទួលបានផលល្អទាំងការសិក្សា និងការងារស្ម័គ្រចិត្ត?

បើយោងទៅតាមបទពិសោធរបស់ខ្ញុំ ខាងក្រោមនេះជាគន្លឹះខ្លះៗដើម្បីឲ្យការសិក្សា និងការងារស្ម័គ្រចិត្តទទួលបានផលល្អ៖

• យកចិត្តទុកដាក់ក្នុងម៉ោងសិក្សា ត្រូវមានភាពក្លាហានក្នុងការសួរលោកគ្រូ អ្នកគ្រូនៅពេលមិនយល់ត្រង់ចំណុចណាមួយ
• ឧស្សាហ៍កត់មេរៀន និងធ្វើកិច្ចការផ្ទះ ព្រោះវាជួយឱ្យយើងស្វែងយល់ និងចាំមេរៀនថែមមួយកម្រិតទៀត
• កត់ត្រានូវកាលបរិច្ឆេទ និងមេរៀនចេញប្រឡងលើសៀវភៅសរសេរ ឬប្រតិទិនលើតុ
• ស្រឡាញ់ការងារដែលខ្លួនធ្វើ ធ្វើការដោយមានទំនួលខុសត្រូវ និងយកចិត្តទុកដាក់
• កំណត់គោលដៅ និងសម្រេចនូវអ្វីដែលខ្លួនត្រូវធ្វើជារៀងរាល់ថ្ងៃ
• បើមានពេលទំនេរ យល់ល្អបំពេញកិច្ចការឱ្យហើយសិនសឹមសម្រាកកម្សាន្ដ
• ផ្ចង់អារម្មណ៍នៅពេលធ្វើអ្វីមួយទើបបានសម្រេច ចៀសវាងការបែកអារម្មណ៍ទៅធ្វើរឿងអ្វីផ្សេង។ល។
• អ្វីដែលសំខាន់ជាងគេគឺ មានសុខភាពល្អទាំងផ្លូវកាយ និងផ្លូវចិត្ត។​ ពោលគឺចេះរកពេលសម្រាប់ខ្លួនឯង ធ្វើយ៉ាងណាឱ្យខ្លួនមានអារម្មណ៍ល្អនៅពេលប្រឈមមុខនឹងភាពតានតឹងពីការងារ ព្រមទាំងថែរក្សាសុខភាពឱ្យបានល្អ បរិភោគអាហារមានជីវជាតិ​ និងសម្រាកឱ្យបានគ្រប់គ្រាន់។ បើយើងពុំមានសុខភាពល្អ ក៏ពិបាកក្នុងការធ្វើការ និងរៀនសូត្រដែរ។

គេថា «ការងារបង្រៀនមនុស្ស» គ្មាននរណាម្នាក់កើតមកភ្លាមចេះភ្លាមទេ គឺតម្រូវឱ្យមានការសាកល្បង ការរៀនសូត្រ ការអនុវត្ត ហើយខ្ញុំជឿថាសាលារៀន អន្ដរទ្វីប អាមេរិកាំងគឺជាកន្លែងដែលឥតល្អខ្ចោះសម្រាប់សិស្សានុសិស្សទាំងអស់គ្នា។

យុវជន​ ជា​វ័យ​មួយ​ដែល​ពោរពេញ​ទៅ​ដោយ​ថាមពល​ និង​បញ្ញា​ស្មារតី​ក្លាវ​ក្លា​ ជាពិសេស​ពួកគាត់​ជា​កម្លាំង​ស្នូល​ក្នុង​ការចូលរួម​គ្រប់​សកម្មភាព​នានា​ក្នុង​សង្គម​ ក៏ដូចជា​ការ​អភិវឌ្ឍ​ជាតិ​ផង​ដែរ​។ យុវជនទាំងអស់​នៅ​កម្ពុជា​យើង​មាន​ប្រមា​នប្រ​ហែល​ជាង​៥០​% នៃ​ចំនួន​ប្រជាជន​សរុប​។ យុវជន​ គ្រួ​ច ឈីម​ ជា​សិស្ស​ម្នាក់​រៀន​នៅ​សាលា​ AIS​ ថ្នាក់​ទី១២​”ក” នា​ឆ្នាំ​សិក្សា២០១៨​-២០១៩​ នេះ​។ យុវជន​រូប​នេះ​ កើត​ក្នុង​ត្រកូល​អ្នកមាន​ជីវភាព​បង្គួរ​នៅក្នុង​រាជធានី​ភ្នំពេញ​។

អ្នកអាណាព្យាបាល​របស់​យុវជន​រូប​នេះ​ បាន​ចំណាយធនធាន​ផ្ទាល់ខ្លួន​អស់​ជាច្រើន​សម្រាប់​ផ្គត់ផ្គង់​ការសិក្សា​របស់​កូន​គាត់​។ ឆ្នាំនេះ​ជា​ឆ្នាំ​ដែល​ពួកគាត់​ត្រូវ​ ប្រឡង​សញ្ញាបត្រ​មធ្យមសិក្សា​ទុតិយភូមិ​។ សិស្សានុសិស្ស​ទាំងអស់​កំពុងតែ​មមាញឹក​ស្ទើរ​រក​ពេល​ញាំ​បាយ​គ្មាន​ព្រោះ​ត្រូវ​ប្រឹងប្រែង​រៀនសូត្រ​ ត្រៀមប្រឡង​។ គាត់​ក៏ដូចជា​សិស្ស​ដទៃទៀត​ដែរ​ តែ​អ្វី​ដែល​ខុសប្លែក​ពី​គេ​នោះ​ គឺ​គាត់​បាន​ចំណាយ​ពេល​លក្រៅ​ពី​ការសិក្សា​ទៅ​ជួយការ​ងារ​ក្នុង​សា​សា​ និង​ក្នុង​សង្គម​ជាច្រើន​។ ការងារ​ក្នុង​សាលា​មាន​ដូចជា​ បើក​ក្លិប​សិក្សា​រៀងរាល់ថ្ងៃ​សៅរ៍​ អាទិត្យ​ ធ្វើជា​ប្រធាន​សម្របសម្រួល​កម្មវិធី​សា​លា​ផ្សេង​ៗ (យុវជន​ស្ម​គ្រ​ចិត្ត​) និង​ការងារ​សប្បុរស​ធម៌​ផ្សេង​ៗជាច្រើន​ទៀត​។ ចំណែក​ឯកម្មវិធី​ក្រៅ​សាលា​វិញ​មាន​ដូចជា​ ដាំ​ដើមឈើ​ លាបថ្នាំ​ សាលា​……។ យើង​ក្រឡេក​ទៅ​មើល​លទ្ធផល​សិក្សា​វិញ​ គឺ​គាត់​នៅតែ​ល្អ​ គ្មាន​ការ​ធ្លាក់ចុះ​។ សូម​បញ្ជាក់​ផង​ដែរ​ថា​ ការងារ​ខាងលើ​នេះ​ ពួកគាត់​ចាប់​ប្រឡូក​តាំងពី​ថ្នាក់​ទី១០​ មក​ម្លេះ​។ ខាងក្រោម​នេះ​ជា​វិធី​សាស្រ្ត​ ក៏ដូចជា​ការចែក​រំលែក​នូវ​បទពិសោធន៍​ដែល​ធ្វើ​ឱ្យ​ពួកគាត់​នៅតែ​ខ្លាំង​។

ចំពោះ​យុវ​សិស្ស​ ​;ឈីម​ គាត់​បាន​និយាយ​ថា​” ក្នុង​មួយថ្ងៃ​មនុស្ស​ម្នា​ក់ៗ​មាន​ពេលទំនេរ​សម្រាក​ពី​ការ​គេង​ ប្រហែលជា១៦ទៅ​ ១៧ម៉ោង​។ ដូច្នេះ​ត្រូវ​បែង​ចែ​កពេ​វេលា​ឱ្យ​បាន​ច្បាស់លាស់​ (ពេល​រៀន​ ពេលសម្រាក​ ពេលធ្វើការ​ងារ​សង្គម​)។ ចំពោះ​ការសិក្សា​គាត់​បាន​ និយាយ​ថា​ ត្រូវ​គ្រប់គ្រង​អារម្មណ៍​ខ្លួនឯង​ឱ្យ​បាន​ក្នុង​ការ​ស្តាប់​គ្រូ​ពន្យល់​នៅ​ថ្នាក់​ ក៏ដូចជា​ការ​កត់ត្រា​មេរៀន​ និង​សួរ​-ឆ្លើយ​មេរៀន​ក្នុង​ម៉ោង​នី​មួយ​ៗផង​ដែរ​។ ឯវិធីសាស្ត្រ​នៅផ្ទះ​វិញ​ គឺ​ត្រូវ​​កំណត់​មុខវិជ្ជា​ណា​ដែល​ច្បាស់​ មួយ​ណា​ដែល​មិន​ច្បាស់​ដើម្បី​ងាយ​ស្រូល​ពង្រឹង​បន្ថែម​។ មួយវិញទៀត​ រៀងរាល់​ព្រឹក​គាត់​តែង​រំលឹក​មេរៀន​នៅផ្ទះ​ជាប្រចាំ​។ លើស​ពីនេះ​ទៅទៀត​ អ្វី​ដែល​ជា​ចំណុចខ្លាំង​របស់​គាត់​ គឺ​តែងតែ​យក​​មេរៀន​ ឬលំហាត់​ដែល​ខ្លួន​អាច​ធ្វើ​បាន​ ឬយល់​ទៅ​ពន្យល់​មិត្តភក្តិ​ ដើម្បី​ចែករំលែក​ ក៏ដូចជា​បន្ថែម​ និង​ពង្រឹង​​សមត្ថភាព​ខ្លួន​គាត់​ផ្ទាល់​តែម្តង​។ គាត់​មាន​ផែនការ​យ៉ាង​ច្បាស់​ក្នុង​ការបែងចែក​ពេលវេលា​រៀន​ និង​ការងារ​សង្គម​។ ចំពោះ​ការងារ​សង្គម​ គាត់​បាន​និយាយ​ថាត្រូវ​តែ​ឆ្លៀតពេល​ទំនេរ​ ឬនៅ​ចុង​សប្តាហ៍​។ ពេលខ្លះ​គាត់​បាន​និយាយ​ថា​ ការងារ​នេះ​បាន​ពង្រីក​ចំណេះដឹង​មួយ​កម្រិត​ដែល​គាត់​មិនធ្លាប់​ជួប​ក្នុង​មេរៀន​។ ការងារ​ដែល​គាត់​បាន​ចូលរួម​មាន​ដូចជា​ យុវជន​ស្ម័គ្រចិត្ត​ បេតិកភណ្ឌ​ លាបថ្នាំ​សាលា​ រៀបចំ​ការ​បើក​-បិទ​បវេសនកាល​សាលា​ជាដើម​។ទោះបីជា​យុវជន​រូប​នេះ​រវល់​ស្ទើរ​រក​ពេលទំនេរ​ គ្មាន​យ៉ាងណាក៏ដោយ​ តែ​ការសិក្សា​របស់​គាត់​មិន​ធ្លាក់ចុះ​ឡើយ​ គាត់​នៅតែ​កាន់​លំដាប់​ A ជានិច្ច​ជា​រៀងរាល់​ខែ​។ សម្រាប់​ការដែល​យក​និទ្ទេស​នេះ​នៅ​សាលា​AIS​ វា​មិនមែន​ជា​ការ​ចៃដន្យ​នោះ​ទេ​ គឺ​ត្រូវតែ​ប្រឹង​អស់ពី​កម្លាំងកាយ​ និង​ចិត្ត​។ គាត់​បាន​បង្ហើប​ពី​ល្បិច​នៃ​ការសិក្សា​របស់​ប្អូន​ដែល​មិន​ធ្លាក់ចុះ ​ទោះ​មានការ​រវល់​ក្នុង​ការងារ​សង្គម​ ដូច​ខាងក្រោម​នេះ​៖

• រៀបចំ​កាលវិភាគ​សិក្សា​ឱ្យ​បាន​ល្អ​នៅផ្ទះ​ឱ្យ​ស្រប​ជាមួយ​កាលវិភាគ​សាលា​ មានន័យថា​ត្រូវ​រំឭក​មេរៀន​ដែល​បាន​រៀន​រួច​នៅ​សាលា​ ឯផ្ទះ​ក៏​ដូចគ្នា​។
• ព្យាយាម​រក​ពេល​ស្រាវជ្រាវ​មេរៀន​ខ្លួនឯង​នៅផ្ទះ​ ជាជាង​ដើរ​រៀន​គួរ​នៅ​ខាងក្រៅ​។
• ធ្វើលំ​ហាត់​ផ្នែក​វិទ្យាសាស្ត្រ​ពិត​ឱ្យ​បាន​ច្រើន​តាម​លទ្ធភាព​ដែល​អាច​។
• សម្រាក​ឱ្យ​បាន​គ្រប់​គ្រ​ន់​ និង​ញ៉ាំ​អាហារ​ឱ្យ​បាន​ទៀងទាត់​មាន​អនាម័យ​ និង​ជីវជាតិ​។
• ព្យាយាម​ក្រោក​ពីព្រលឹម​ រំឭក​មេរៀន​ព្រោះថា​ ពេលព្រឹក​ជា​ពេលវេលា​ដែល​ខួ​ក្បាល​ស្រលះ​ល្អ​ និង​ទន្ទេញ​ងាយ​ចាំ​។
• មក​រៀន​ឱ្យ​ទៀងទាត់​ ទាន់ពេល​វេលា​ និង​នៅក្នុង​ថ្នាក់​ប្រើ​ សុ​ ចិ​ បុ​ លិ​ ឱ្យ​មាន​ប្រសិទ្ធិ​ភាព​។

កើត​មក​ជា​មនុស្ស​ក្នុងលោកនេះ គឺ​ជា​សំណាង​មួយ​យ៉ាង​អស្ចារ្យ គឺ​យើង​​អាច​ធ្វើ​អ្វី​ដែល​យើង​ចង់​ធ្វើ​ដើម្បី​ខ្លួន​ឯង គ្រួសារ ក៏​ដូច​ជា​សង្គមជាតិ​ផង​ដែរ។ ​ដូ​ចជាយុ​វជន​រូប​ខាង​លើ​នេះ​ស្រាប់ ពួក​គាត់​ទើបតែ​ថ្នាក់​ទី១២ ​សោះ​តែគាត់កំ​ពង់​ដុះ​ពន្លក​ឈាន​ទៅ​រក​យុវ​ជន​គំរូ​ទាំង​ការ​សិក្សា​ និងក្នុងសង្គមផង​ដែ។​​ ដូច​អ្វី​ដែល​​គាត់​បាន​រៀប​រាប់​ខាង​លើ។ ចុះ​អ្នក​វិញ​ក្នុង​នាម​ជា​ពន្លក​ថ្មី ម្នាក់​ដែលបានរៀប​ចំ​ខ្លួន​ហើយ​ឬ​នៅ?