ការប្រកួតចំណេះដឹងភូមិសាស្រ្តជាតិ ម៉េងលី ជេ. គួច (The Mengly J. Quach National Geographic Bee Contest)៖ ត្រូបានបង្កើតឡើងជាលើកទី១ នៅថ្ងៃទី២៤ ខែមិថុនា ឆ្នាំ២០១៣ ក្នុងឆ្នាំសិក្សា២០១២-២០១៣ ដែលជាកម្មវិធីមួយមានប្រជាប្រិយភាពបំផុតសម្រាប់សិស្សានុសិស្សនៅទូទាំងពិភពលោក ហើយត្រូវបានគេប្រារឰឡើងជាលើកដំបូងបង្អស់នៅសហរដ្ឋអាមេរិក ក្នុងរដ្ឋចំនួន៥០ នៅឆ្នាំ១៩៨៩។ កម្មវិធីនេះបានជំរុញឱ្យសិស្សានុសិស្សឧស្សាហ៍ព្យាយាមខិតខំប្រឹងប្រែងរៀនសូត្រ និងកាន់តែពូកែជាងមុនលើមុខវិជ្ជាភូមិវិទ្យា និងផែនដីវិទ្យា និងបង្កើនចំណេះដឹងលើភូមិសាស្រ្តជាតិកាន់តែទូលំទូលាយ ជាពិសេសគឺជំរុញលើកស្ទួយវិស័យទេសចរណ៍ ដែលកំពុងមានការចាប់អារម្មណ៍ជាខ្លាំងពីសំណាក់ភ្ញៀវទេសចរជាតិ និងអន្តរជាតិ។ ដោយឃើញអំពីអត្ថប្រយោជន៍ជាច្រើន លោកឧកញ៉ា គួច ម៉េងលី បាននាំយកនូវកម្មវិធីនេះពីបស្ចិមប្រទេសចូលមកប្រទេសកម្ពុជាយើងដំបូងគេបង្អស់ មកប្រារព្ធនៅសាលារៀន អន្ដរទ្វីប អាមេរិកាំង។ យើងមិនអាចបង្រៀនសិស្សឱ្យចេះរាប់ពាន់សំណួរក្នុងរយៈពេលដ៏ខ្លីបានទេ ប៉ុន្ដែឆ្លងតាមការចូលរួមការប្រកួតប្រជែងចំណេះដឹងភូមិសាស្រ្តជាតិនេះ ក្នុងរយៈពេលតែមួយខែប៉ុណ្ណោះ សិស្សានុសិស្សបានសិក្សាស្វែងយល់ និងចង់ចាំមេរៀនភូមិវិទ្យា និងផែនដីវិទ្យា រហូតដល់ជាង៦០០សំណួរបានយ៉ាងច្បាស់លាស់ លើសពីនេះទៅទៀត គឺផ្តល់អាហារូបករណ៍ដល់សិស្សពូកែដែលទទួលជ័យលាភី។